U soli ùn vò più dorma senza pudè basgià
I spondi di a cità d’incantu savuriti
Chì lucini di più cà ellu è po a sà
Ma ùn hè ghjilusia chì u soli risenti
Sò milli fiari ardenti brusgendu in lu so cori
Quand’Aiacciu si vesti di i so raghji ridenti
Chì l’insegnani tandu ciò ch’ellu hè l’amori
È po quandi u celi hè tristu è s’annigrisci
U soli innamuratu appronta u vistitu
Ch’imbillisci a so cara quandu u bughju sparisci
È ni faci a so sposa pà un distinu fiuritu
Ma sì i Sanguinari isuli di magia
S’ammantani di sera di u più bellu culori
Hè chì Aiacciu ricevi cù tamanta allegria
Di u soli i cumplimenti, è li veni u russori