À l’orlu di i cità suminat’à calcina
U rughju di u sciroccu caldu com’è lu pientu
Chì strangola lu sguardu di a vita in pulvina
Quant’emu spassighjatu in i vosci carrughji
Intesu lu frammanti di a parolla d’oru
Quandi à l’ora calda u vapori si sdrughji
Di a menta chì scalda in a menti di u Moru
Da l’Algeria altiera à a Palestina arritta
Quandi a voscia lotta era di libartà
Cantaiamu insembu om’è donni adduniti
Cìò chì sparghjìa amori fedi è fraternità
Quant’emu fattu passi di fronti à l’Urienti
Spirendu in issu mari chì ci hà fattu campà
Arcu di cunniscenza da fà ch’iddu diventi
Trà li spondi radiosi paci è filicità
È quant’emu spiratu spartindu u stessu mondu
À l’ora d’Arafat, Nasser è Ben Bella
Quandu i Lumi vivi si spartian’in tondu
Par dà un antr’avvena à a noscia umanità
Da l’Algeria altiera à a Palestina arritta
Quandi a voscia lotta era di libartà
Cantaiamu insembu om’è donni adduniti
Cìò chì sparghjìa amori fedi è fraternità
Chì sarà sta cundanna chì oghji dà a stizza
È vi fascia di u velu neru di schjavitù
È chì sarà stu mottu chì oghji ven’è schizza
In pianu u sangu pagnu di tanta ghjuventù
Ùn hè lu vosciu diu chì a vi pudarà dì
Ma a forza fundiva chì vi porta à campà
Brusgeti i panni scuri spartimu un novu dì
Contr’à l’imperialismi di l’Otan è d’Allah
Da l’Algeria altiera à a Palestina arritta
Feti ch’a voscia lotta sighi di libartà
È cantarem’insembu om’è donni adduniti
Cìò chì sparghji amori fedi è fraternità