Carezza di sciuma a to manu,
Sguilla nant’à a mo pelle pianu,
Cum’è un marosulu caldu.
Hè
Un viaghju, un ballu, una nanna,
L’onde dolce di e to brame,
Chì mi veculeghja ogni mane.
È mi lasciu andà
À scialà mi la,
Circhendu à piattatelle,
A to pelle.
Ùn vale à francà
Mari è mondi in là.
Pare e cuntrate e più belle,
A to pelle.
Tanti
Sò à vistigà
Mille lochi senza truvà
Una criarella da sunnià.
Per mè
Schjarisce lu celu
Cum’è un ragiu u to visu chetu
Sò mille splendori ch’eo vecu.
À d’altri andà,
Avemu da sunnià,
Feremu un mondu d’amore,
Ogni albore.
Basta à sunnià,
À lascià sfilà,
In un mare di tenerezza,
A carezza.