Soca o puesia ùn sè cà pantumina ?
Cumu ti pudaria difinisce o chjamà ?
È s’è tù fussi prosa ch’omu face rimà ?
Prosa ùn poi esse chì a prosa camina…
Cumu ti pudaria difinisce o chjamà ?
Sè una navicella, una vela latina,
Prosa ùn poi esse chì a prosa camina…
Voca o puesia, nata sè per ballà !
Sè una navicella, una vela latina
Mossa da l’estru mattu di u ventu chì và
Voca o puesia, nata sè per ballà !
Nata sè per ballà nant’à l’onda turchina.
Mossa da l’estru mattu di u ventu chì và
È a musa cilesta di l’ambata marina,
Nata sè per ballà nant’à l’onda turchina,
Cun tè ogni puetu hè prontu à navicà.
È a musa cilesta di l’ambata marina
Allusinga u core chì ti vole abbraccià,
Cun tè ogni puetu hè prontu à navicà
Da l’attrachjata malba à l’alba purpurina.
Allusinga u core chì ti vole abbraccià
A franasia chì qualchì parolla chjina
Da l’attrachjata malba à l’alba purpurina,
Senza pudè discioglie sonniu è rialità.
A franasia chì qualchì parolla chjina
Sulchighjendu stu fogliu d’inchjostru verità
Senza pudè discioglie sonniu è rialità…
Soca o puesia ùn sè cà pantumina ?