Fluixa paul andré - A puesitica

Hè bella s'ell' hè corta è capita da tutti,
s'è a robba ch'hè colta hè dolce cum'è frutti,
s'è di viziu hè scorta è senza colpi brutti.

Hè ricca s'è astuta è tene cari i soi,
s'è a strada tenuta à nimu porta annoi.
S'ell'ùn face cicuta cantendu li so lodi.

Hè cruda senza core s'ella burla la rima,
s'ella porta favore à nemicu di prima,
tandu nasce rancore u fondu piglia cima.

Hè sincera è franca s'ella tene parolla
s'è cun nim'ùn si manca è per sempre cuntrolla
chì ghjente ùn si stanca di stinzanne la molla.

Hè dinù d'utilità s'ella strada l'avvene,
s'ella si sà accuncià cun quellu chì sustene,
s'ella ci face sperà à l'alba chì cunvene.

Hè bella s'ell'addoppia rima in puesia
eppo quand'ella accoppia ghjente di la famiglia
per fà quì, d'issa stoppia un pasculu d'inviglia.