Limongi tittò - Puesia avà sì tù

In un fondu d’un quaternu
Cum’andendu à malavia,
Un scrittucciu stava indernu
Aspittendu à qualchissia.
Ghjera una puesia
Pienghjia.

_Cumu hè chì stai sola
È chì nimu ùn ti fideghja ?
Sò chì quandu a Musa vola
Ella à spessu sunnieghja.
È tù stai in a buffeghja
In canteghja

_M’anu pensu per i mei
Ma ùn mi possu più sprime
Mi sò chjappu versi è pedi
In trà un pugnu di rime.
Sò luntanu di e cime
È stime.

_Trà i versi chè tù spendi
Ci stà un locu d’incantu
Tuttu ciò chè tù difendi
Ùn mette a lingua da cantu
Di tè ne feremu un cantu
Tamantu.

È dapoi quellu ghjornu
Si spanna à voline più
Cum’un sole di ritornu
Risplende è luce quassù
Puesia avà sì tù
Puesia avà sì tù !