Sò ch’ùn l’aghju ancu scritta
Hè cum’una meludia
Chì mai nun pò stà zitta
È quella ch’e aghju in mente
Spessu si vole fà sente
Sò cum'è ogni pueta
Sempre in cerca di rima
Incù a spirenza sicreta
Di truvà di tutte a prima
È la mo musa sigueta
Chì micca ùn pò stà cheta
Davanti à u fogliu biancu
Quandu riccu hè lu sugettu
Incù a penna mai stancu
Fallu ùn face l’intillettu
Ma s’ella accade ogni tantu
L’inspirazione aspettu
È dopu quand’e sò in sestu
Godu u piacè di cumpone
Spiccendumi lestu lestu
Di fà puesie è canzone
È issu ghjocu ùn arrestu
Sin’à ch’aghju l’inspirazione
Scrivu ancu pè a billezza
Di lu fiore di viranu
Per la gioia è la tristezza
O l’anellu di la mio manu
Eppo ancu qualchì volta
Pè un mondu più umanu
Bella hè la so cumpagnia
Quand’e sò solu cun ella
Cù l’amica puesia
Passu qualchi stundarella
Felice campu in armunia
È la vita hè propiù bella