Frà i nuli grisgiogni,
Sò impaladiti li so ragi
Languidi è tipidogni,
Cum’è ghjorni fugaci
Sò svaniti li sonnii.
Cumu ti possu fà capì ?
L’amore hè sempre quì.
L’intrachju di malba frisginga
L’onde è u firmamentu
L’ora s’allonga è allusinga
U ghjornu à tradimentu,
Eppo’ a notte azzinga
U so velu di pientu.
O quantu temu l’imbrunì,
L’amore hè sempre quì.
U celu di lacrime sbarsa
È u core dinù,
Candilleghja a luce scarsa
A luna ùn splende più,
A to voce m’hè parsa
Ma ùn era micca tù.
Ùn possu più campà cusì,
L’amore hè sempre quì.