Ristori / Conca - Lettara à tè



Par a so nascita, Leandru ricivì una puesia scritta da un amicu pueta : Ghjuvan petru Ristori.


À Leandru è i so cari genitori,

Fiore primaticciu  

Sentu dì chì a stagione
Hè primaticcia è desta,
Chì per u vostru rughjone
A campagna face festa, 
Pè favuri e canzone
Dunque accettate questa. 

Ghjorni scorsi aghju lettu,
Parvenudumi d'Aiacciu,
Cù piacè è gran dilettu
U cummuvente dispacciu.
Cù un travoccu d'affettu
A mio risposta vi facciu.

Oggettu di tant'amore,
'ssu vostru caru bambinu
Sbucciatu cum'è un fiore
À u pede d'un gran' pinu
Vi svela, novu, l'albore
Pè schjarivvi u caminu.

Leandru ellu si chjama
Chì d'ogni nulu vi spanna,
Fruttu di a vostra brama
V'hè dolce più ch'è a manna.
È Soniucca la so' mamma
Impruvisendu l'annanna.

O Stè poi esse fieru
Di stu primu figliulettu.
Era u vostru penseru
È u desideriu schiettu,
Un sognu senza misteru
Da dentru è for di lettu.

Ghjuvellu in u so' stucciu,
Veru tesoru framente
Ogni sera à 'ssu ciucciu
Li serà datu di sente
Qualchì dolce abbiucciu
Cantichjatu pianamente.

Vi tuccherà à pruvede,
Incù l'aiutu supranu,
Di fà ingrandà st'erede, 
In u ambiu paisanu
Sempre bagnatu di fede, 
Da Corsu è Cristianu.

È l'anima benedetta,
Chì Diu cù a so manu
U mantenga, mente schietta,
Di salute sempre sanu
È ch'ella li sia detta
L'andatura di l'Anzianu.

Cullatelu in paese
Ch'ellu trovi a so' meta
È pè favuri l'attese
D'una famigliola quieta
Da veru Marignanese
Serà, certu, gran pueta.

...O Leà, fiurucciu novu
Sbucciatu sott'à stu clima,
Scrivendu in vanu provu,
À mette fondu è cima.
...Duve l'avaranu trovu
Issu nome senza rima.


Ghjuvan petru



U tempu passò... è 2 anni dopu, Leandru è Ghjuvan petru si scuntronu par a prima volta. Ghjuvan petru li rigalò u so libru "Da a ripa ventosa" è Leandru li prumesse una risposta ch'ellu li fece calchì ghjornu dopu...




À Ghjuvan petru,

Risposta di u fiore primaticciu

 Di l’amandulu u fiore
Ùn sò cà duie e stagione
Ma mi piace oghje à albore
D’avè in manu u librone
Rigalatu cù u core
Da Ristori u puitone

Di risponde à questu amicu
Sempre a vulia fà
Ma u parlatu di Vicu
Par pudè scrive è cantà
Era calcosa a ti dicu
Prima à ben ammaistrà

Ch’ellu sia salutatu
Quellu di A Riventosa
Chì u tempu aghju pigliatu
Par risponde à a so improsa
Ma avà sò ingrandatu
È possu impinnà calcosa

Face un paghju d’anni fà
Chì mi cunsigliasti in rima
È di stu fattu o cumpà
Ti portu una grande stima
Chì in corsu allettu avà
Cane, sumere è bima

Di u me caru paese
Batte in pettu a ciccona
È ùn si passa un mese
Senza chì a me parsona
Cù e duie arechje tese
Ùn ascolti a so canzona

Sappia chì di babbu è mamma
Aghju intesu e canzone
A paghjella è a nanna
Sò state e prima lizzione
Par cunnosce calchì rama
Di e nostre tradizione

Vedi bè chì i to cunsigli
I m’aghju pigliati tutti
È u chjassu chì tù pigli
Duva i versi ùn sò sdrutti
Trà i fiori è i stigli
Hà datu i più belli frutti

Incù una fede eterna
È a to penna sè mossu
Dendu una voce fraterna
Di u pueta in rinforzu
À a me vita muderna
Ma chì t’hà u stintu Corsu

Par e future canzone
À a to musa diletta
Sapendu chì u me nome
Poche rime ellu accetta
Li facciu a sugistione 
Di fallu rimà cù Filetta


Leandru