È vistu tante ricchezze
Eppo mi sò smaravigliatu
Di tutte le so billezze
Ma mai ùn mi sò scurdatu
Di le prime tinnarezze.
Di lu primu surrisu
Quandu l’ochji aghju apartu
È vistu un dolce visu
D’amore per mè carcu
Era lu toiu o mà
È di basgi m’ai cupartu.
O mà sè la più cara
Per tè u mo affettu prufondu
Sè a rosula la più rara
A piu bella di u mondu
Sè la prima è prifirita
Tù chì m’ai datu la vita.
A zitellina cun tè fù
Cusì dolce è sebiata
Eppo dopu la mo ghjuventù
Da tè sempre bè stradata
M'ai amparatu e virtù
Di quella vita passata.
Spessu sentu parlà
Di ricchezze è di furtuna
Eppo dinù ancu vantà
La bella bionda o la bruna
Ma ùn ti ponu rimpiazzà
Chì mamma ùn ci n’hè cà una.
Inde lu gattivu mumentu
Quandu tuttu male và
Inde l’angoscia è lu turmentu
Chì mi facenu strazià
A mo voce tandu sentu
Chì chjama è dice o mà
Di lu tempu si sà
La sfiera gira è corre
Oghje sè partuta o mà
È forte hè lu mo dulore
Ma grande la to piazza sarà
Sempre in fondu di lu mo core.
Incù surelle, fratelli o mà
Parlemu di tè stonde è ore
È malgratu la vita d’avà
Ancu sì lu tempu corre
Sè sempre prisente o mà
Chì una mamma mai ùn more.