eddi
innò
ùn pudiani stà
muti
senza fà nudda
à mora senza briunà
senza strapadassi micca
allora si sò mossi
ci vulia à scità si
imparà
metta i mani in u lozzu
in i nostri vai
è ani imparatu
ani imparatu à fà
chì c'era urgenza
urgenza à invintà
urgenza à sciappà
crià
bisognu di batta si
briunà a nostra tuntia d'omini
ritenalu incu a so vita
issu tempu di ghjuventù
issa scimughjina
issa brama di l'avvena
issa brama di campà
à dirrotta di coddu
eddi l'arcaiachi
i tonti
i nucenti
chì cridiani in i steddi
iè
si sarani sbagliati
si sarrani brusgiati
in a notti scura
cunsumatu a so vita
ma ani fattu
ani fattu
eddi
ani briunatu
ani briunatu forti chè no erami vivi
chè no erami quì
no
chì durmiami tranquilli
ani smuntatu i monti
l'ani sciappati
i muri di i nostri prighjò
bulicatu in a nostra mimoria
in i nostri dulori
è l'ani sunniatu
maiori
eddi
è micca una necci
issu paesi novu
da no
invintatu
iè
l'ani invintatu
ma eiu
ch'aghju fattu
ch'aghju fattu eiu